Kottappally

കോട്ടപ്പള്ളിയില്‍ സി.പി.എം - മുസ്‌ലിം ലീഗ് സംഘര്‍ഷത്തില്‍ ആറുപേര്‍ക്ക് പരിക്കേറ്റു. ടൗണില്‍ കൂടിനിന്ന ഇരുവിഭാഗങ്ങളെയും പിരിച്ചുവിടാന്‍ പോലീസ് ഒരു തവണ ഗ്രനേഡ് പ്രയോഗിച്ചു.

കൊടി നശിപ്പിച്ചതുമായി ബന്ധപ്പെട്ട് കഴിഞ്ഞ ദിവസങ്ങളില്‍ ചെറിയ പ്രശ്‌നങ്ങള്‍ നിലനിന്നിരുന്നു. ഇതേച്ചൊല്ലിയാണ് കോട്ടപ്പള്ളി ടൗണില്‍ സംഘര്‍ഷമുണ്ടായത്. ഇരുവിഭാഗവും തമ്മില്‍ കല്ലേറുമുണ്ടായി. പോലീസ് ഗ്രനേഡ് പ്രയോഗിച്ച് ഓടിച്ചു. കല്ലേറില്‍ ഒരു സ്ത്രീക്ക് പരിക്കേറ്റു. ഇതിനിടെ സി.പി.എം. ബ്രാഞ്ച് സെക്രട്ടറി പുതിയോട്ടുകണ്ടി ബാബുവിനെ വീട്ടില്‍ കയറി ഒരു സംഘം മര്‍ദിച്ചു. ബാബുവിന്റെ ഭാര്യ മനീഷയ്ക്കും മര്‍ദനമേറ്റു. ഇവരെ വടകര സഹകരണ ആസ്പത്രിയില്‍ പ്രവേശിപ്പിച്ചു. മുസ്‌ലിം ലീഗ്കാരാണ് അക്രമിച്ചതെന്ന് സി.പി.എം. ആരോപിച്ചു.

ലീഗ് പ്രവര്‍ത്തകന്‍ ഞാറലോട്ട് റഷീദിനെയും ഒരു സംഘം വീട്ടില്‍ കയറി എറിഞ്ഞ് പരിക്കേല്പിച്ചു. കോട്ടപ്പള്ളി ടൗണില്‍വെച്ച് പുന്നോളി മീത്തല്‍ മുബാറക്, മിഹ്‌റാജ് മന്‍സിലില്‍ അഫ്‌സല്‍ എന്നിവര്‍ക്കും മര്‍ദനമേറ്റു. സി.പി.എമ്മുകാര്‍ മര്‍ദിച്ചെന്നാണ് പരാതി. ഇവരെ വടകര സഹകരണ ആസ്പത്രിയില്‍ പ്രവേശിപ്പിച്ചു.

വടകര സി.ഐ. പി.ശശികുമാറിന്റെ നേതൃത്വത്തില്‍ വന്‍ പോലീസ് കാവല്‍ ഏര്‍പ്പെടുത്തിയിട്ടുണ്ട്.